काठमाडौं । अन्नपूर्ण संरक्षण क्षेत्रमा जथाभावी होटल खोल्ने क्रम बढेको छ । अनुमति नै नलिइ खुलेका यस्ता होटलमाथि नियन्त्रण जरुरी रहेको भन्दै अन्नपूर्ण संरक्षण क्षेत्र आयोजना (ए–क्याप) ले बल्ल अनुगमन र नियमन सुरु गरेको छ ।
डुडखर्कदेखि फेरेसक्याम्प, बादल डाँडा, हाइक्याम्प (भ्यू प्वाइन्ट) सम्मको क्षेत्रमा विगत दुई वर्षदेखि अवैधानिक होटल तथा रेस्टुराँ निर्माण भएका छन् ।
यसरी अवैध रुपमा खुलेका केही होटल तथा रेष्टुरेन्ट बन्द गराउन लागिएको छ । कास्कीको मर्दी हिमालको पदमार्गमा अवैधानिक रूपमा सञ्चालन भएका ११ वटा होटल तथा रेस्टुराँहरू बन्द गर्ने तयारी भएको जनाइएको छ ।
पटक–पटक सार्वजनिक जग्गामा होटल तथा रेस्टुराँ नबनाउन आग्रह गर्दा पनि अटेर गर्दै बनाइएका होटल तथा रेष्टुरेन्टका संरचना बन्द गराउने जनाइएको छ ।
ए–क्यापका अनुसार मर्दी हिमाल पदयात्रामा पर्ने खिमबहादुर तामाङ, अमृत तामाङ, यामबहादुर तामाङ, सुकबहादुर तामाङ, धनबहादुर तामाङ, यामबहादुर तामाङ, शिवलाल गौतम, रोशन गुरुङ, देविलाल भण्डारी, सुदीप ढुंगाना र हरिबहादुर क्षेत्रीका होटल बन्द हुनेछन् ।
अवैध रुपमा खुलेका होटल तथा रेस्टुराँ ए–क्यापले बन्द गराइ जफत गर्ने भएको छ ।
ए–क्याप पोखराका प्रमुख राजकुमार गुरुङले मर्दी हिमालको पदमार्गमा हाल ९ वटा होटल तथा रेस्टुराँहरूले मात्र ए–क्यापसँग अनुमति लियर सञ्चालन गरेको अन्यथा सबै अवैध रूपमा सञ्चालन भएको बताए ।
पदमार्गका डुड खर्क, फोरेस क्याम्प, लो क्याम्प र हाइ क्याम्पमा कम्तीमा साढे दुई घण्टा पैदलको क्षेत्रमा होटल तथा रेस्टुराँहरू निर्माण गर्ने कार्यविधि छ ।
स्थानीय व्यवसायीका अनुसार यसरी अवैध रुपमा होटल सञ्चालन गर्नेहरुले ५० लाखदेखि ६५ लाखसम्म लगानी गरेका छन् ।
मर्दी हिमालमा सिजनमा दैनिक ५ सयभन्दा बढी पर्यटक जाने गरेका छन् ।
प्रतिक्रिया