काठमाडौं । राष्ट्रिय आविष्कार केन्द्रले सरकारबाट पर्याप्त सहयोग नपाइरहेको र अपेक्षित रुपमा सहयोग पनि जुट्न नसकिरहेको बेला एक जापानीले आश्चर्यजनक रुपमा ५७ लाख ३७ हजार रुपैयाँ सहयोग गरेका छन् । आविष्कार केन्द्रका सञ्चालक महावीर पुनका अनुसार ति जापानीलाई उनले चिनेका पनि छैनन् र ति जापानी हालसम्म नेपाल आएका पनि छ्रैनन् ।
आविष्कार केन्द्रलाई सहयोग गर्ने जापानी उमेरले ७५ वर्षीय हुन् । उनले राष्ट्रिय आविष्कार केन्द्रको हिमालयन बैंक लिमिटेडको खातामा ५१ हजार अमेरिकी डलर जम्मा गरेका छन् । हालको सटहीदर अनुसार यसको मूल्य ५७ लाख ३७ हजार ५७६ रुपैयाँ हुनेछ ।
हाल अवकास जीन्दगी बिताइरहेका ति जापानी सेइची वातानाबे हुन् र उनी जापानको चिबा प्रिफेक्चर भन्ने स्थानमा बसछन् ।
राष्ट्रिय आविष्कार केन्द्रको बारेमा जानकारी भने उनले जापानमै रहेका नेपाली विद्यार्थी डा. सन्दीप शाक्यबाट पाएका हुन् ।
शाक्य जापानको अस्पतालमा काम गरिरहेका छन् । उनी र जापानमा काम गर्ने नेपाली डाक्टरहरु मिलेर आशा नामक एउटा संस्था खोलेर नेपालमा स्वास्थ्य क्षेत्रमा सहयोगहरु गरिरहेका छन् ।
सन्दीपले काम गर्ने अस्पतालमा वातानाबे सान भन्ने जापानी नागरिक उपचारको क्रममा आउने रहेछन र सन्दीपले नै उनको उपचार पनि गर्दा रहेछन् । यसरी चिनजान भएछ र उपचारको क्रममा भेटघाट हुने रहेछ । त्यहि सिलसिलामा निज जापानिजले आफु नेपाल नगएको भएपनि नेपाललाई सहयोग गर्ने ईच्छा देखाएछन् र कुन कामको लागी नेपालमा कसलाई सहयोग गर्दा राम्रो हुन्छ भनेर सन्दीपलाई सोधेछन ।
डा. सन्दीपले पनि राष्ट्रिय आविष्कार केन्द्र र यसको काम को बारेमा सम्पूर्ण जानकारी दिएर आविष्कार केन्द्रलाई सहयोग गर्यो भने नेपाल र नेपालीहरुलाई धेरै फाइदा हुन्छ भनेछन् । सन्दीपले ति जापानिजलाई राष्ट्रिय आविष्कार केन्द्रको हिमालयन बैंक लिमिटेडको खाता नम्बर दिएछन् र ति जापानीले यसरी सहयोग गरेको पुनले फेसबुकमा लेखेका छन् ।
प्रतिक्रिया