पोखरा । पोखरामा निर्माण भइरहेको अन्नपूर्ण केबलकार निर्माण करिब दुई महिनादेखि ठप्प छ । केबलकार निर्माण ठप्प हुनुको कारण भने त्यति ठूलो छैन अर्थात बोल्ट हराउँदा यसको निर्माण रोखिएको हो ।
केबलकारमा जडान गर्ने टावरलाई टाइट गर्ने बोल्टहरू हराएकाले निर्माण कार्य करिब २ महिना प्रभावित हुन पुगेको यसका निर्माणकर्ताहरुले जनाएका छन् । जापानी कम्पनीले पठाएको मेसिनसहितको सामानमा करिब २ सय बोल्ट हराएकाले टावर राम्रोसँग कस्न र तारसहितको गोण्डला राख्ने कामसमेत यसबाट प्रभावित भएको छ ।
नयाँ बोल्ट निर्माणका लागि जापानी कम्पनीलाई पुनः आग्रह गरिएकाले आगामी दुई सातमा बोल्ट भित्रिनेछन् । केबलकार निर्माणको अन्तिम चरणमा पुगेकाले जापानबाट अनुगमन तथा सुपरीक्षण गर्न दुई प्राविधिक टोलीसमेत पोखरा आएको छ ।
अन्नपूर्ण केबलकारको ८५ प्रतिशत निर्माण पूरा भएको र आउँदो वैशाखमा परीक्षणको तयारी गरिएको छ । केवलकारमा १८ वटा टावर निर्माण गरिएको छ ।
यो केबलकारमा कुल १ अर्ब ४० करोड लगानी हुने अनुमान गरिएको छ ।
प्रतिक्रिया